კანონდამრღვევ მოქალაქეს არადეკლარირებული ნაღდი ფულის ჩამორთმევა სანქციის სახით შეეფარდა, ვალდებული ვართ, საბაჟო საზღვარზე განხორციელდეს ყველა კონტროლის ღონისძიება, მათ შორის 30 000 ლარზე მეტი ნაღდი ფულის, – ამის შესახებ ნათქვამია შემოსავლების სამსახურის მიერ გავრცელებულ განცხადებაში.

განცხადების თანახმად, აღნიშნულ ფაქტთან დაკავშირებით სოციალურ ქსელში მოქალაქის მიერ გავრცელებული ინფორმაცია საზოგადოების შეცდომაში შეყვანას ისახავს მიზნად.

„ფინანსთა სამინისტროს შემოსავლების სამსახური ეხმაურება სოციალურ ქსელ „ფეისბუქზე“ მოქალაქის მიერ გავრცელებულ ინფორმაციას, რომელიც ემსახურება საზოგადოების შეცდომაში შეყვანას და მიზნად ისახავს უწყების დისკრედიტაციის მცდელობას.

შემოსავლების სამსახური განმარტავს, რომ „სარფის“ საბაჟო გამშვები პუნქტის, მებაჟე ოფიცრის მიერ, საბაჟო კონტროლის ფარგლებში, მოხდა საქართველოს მოქალაქის ბ.მ-ს და მისი მართვის ქვეშ არსებული ავტომობილის შეჩერება.

საქართველოს საბაჟო საზღვრის გადაკვეთისას, უფლებამოსილმა პირმა, ეჭვის საფუძველზე, განახორციელა მძღოლთან ინტერვიურება/გასაუბრება, (ინტერვიურების პროცესი ასახულია სამხრე კამერის ჩანაწერებში). აღნიშნული გასაუბრებისას, მძღოლმა განაცხადა, რომ არ გადაადგილებდა სავალდებულო დეკლარირებას დაქვემდებარებულ საქონელს. ავტომობილის, ბარგის და ხელბარგის დათვალიერების შედეგად, აღმოჩენილი იქნა სავალდებულო დეკლარირებას დაქვემდებარებული ნაღდი ფულის სახით უცხოური ვალუტა – 19 100 აშშ დოლარი. ეროვნული ბანკის გაცვლითი კურსის მიხედვით, 51 508,88 ლარი.

ხაზგასმით აღვნიშნავთ, რომ შემოსავლების სამსახური ვალდებულია, საბაჟო საზღვარზე განახორციელოს ყველა კონტროლის ღონისძიება, მათ შორის 30 000 ლარზე მეტი ნაღდი ფულის – ეროვნული და უცხოური ვალუტის, ჩეკების და სხვა ფასიანი ქაღალდების გადამტანი/მიმღები პირების იდენტიფიცირება, აღრიცხვა შესაბამის პროგრამულ მოდულებში.

საქართველოს საბაჟო კოდექსის 169-ე მუხლის II ნაწილის შესაბამისად, კანონდამრღვევ მოქალაქეს სანქციის სახით შეეფარდა არადეკლარირებული ნაღდი ფულის ჩამორთმევა. აღნიშნულიდან გამომდინარე, ფინანსთა სამინისტროს შემოსავლების სამსახური კიდევ ერთხელ მოუწოდებს მოქალაქეებს, მეტი პასუხისმგებლობით მოეკიდონ ქვეყნის უსაფრთხოების საკითხებს და არ გაავრცელონ დეზინფორმაცია, რომლის მიზანიც არის საზოგადოების შეცდომაში შეყვანა“, – ნათქვამია შემოსავლების სამსახურის განცხადებაში.