ქვეყანაში არჩევნების ჩასატარებლად საჭირო პირობები დიდწილად არ არის დაცული და  სამართლიანი არჩევნები მუნიციპალიტეტის ორგანოთა არჩევნებს სტანდარტული სადამკვირვებლო მისიითა და მეთოდოლოგიით არ დააკვირდება, – ამის შესახებ ორგანიზაციის  წარმომადგენლებმა ბრიფინგზე განაცხადეს. მათივე თქმით,  გააგრძელებენ მიმდინარე პოლიტიკური და საარჩევნო პროცესების მონიტორინგსა და შეფასებას.

„სამართლიანი არჩევნების“ მოსაზრებით, ვენეციის კომისიის საარჩევნო ნორმათა კოდექსის ის სამი პირობა, რაც მოიცავს ძირითადი უფლებების პატივისცემას, საარჩევნო კანონმდებლობის სტაბილურობასა და პროცედურული გარანტიების არსებობას, დიდწილად არ არის დაცული, რითაც თავისუფალი, სამართლიანი და კონკურენტული არჩევნების ჩატარების შესაძლებლობა მნიშვნელოვნად არის შეზღუდული.

როგორც სადამკვირვებლო ორგანიზაციაში ამბობენ, ბოლო წლებში მედიის თავისუფლება მკვეთრად გაუარესდა, ასევე მკვეთრად შეიზღუდა არჩევნებზე ობიექტური, უპარტიო საერთაშორისო და ადგილობრივი დაკვირვების შესაძლებლობა.